تاند(چهارشنبه/جولای۲۸) د بریتانیا صدراعظم ډیویډ کامرون پاکستان ته د طالبانو د ملاتړ په خاطر خبرداری ورکړ او ویې ویل داسي نه شي کېدای چې په ظاهره د طالبانو پرضد خبرې کوي خو په پټه له هغوی سره مرسته کوي.
ښاغلی کامرون چې د پاکستان ګاونډي او سیال هیواد هند ته تللی ، همداراز وايي د پاکستان له لوري له هغو ډلو سره چې په تروریستي هلوځلو بوختې دي ، هرراز مرسته د نه زغملو ده .
د بریتانیا صدراعظم وویل د دا ډول ملاتړ او مرستې اسناد پخوا هم موجود وو.
افغان چارواکو تل بریتانوي چارواکي د پاکستان په ملاتړ او په افغانستان کې د پاکستان لاسوهنوته د نه توجه کولو تور لګولی دی . بریتانوي مقامات وايی چې کامرون لا هم په مستقیم ډول د تور ګوته د پاکستان حکومت ته نه ده نیولې.
خو د پاکستان د بهرنیوچارو وزارت د بریتانیا د صدراعظم د څرګندونو په ځواب کې وویل چې د بریتانیا صدراعظم باید له دې زړو اسنادو، چې تایید یې هم ممکن نه دی ، د حالاتو د تحمیلولو لپاره کار وانخلي.
پاکستان د ویکي لیکس له لوري له طالبانو سره د پاکستان د پوځ او استخباراتو د ملاتړ د اسنادو له خپرېدو وروسته وویل چې دا ادعاوې بې بنیاده دي .
کامرون د هند د سفر په ترڅ کې له دې هیواد سره د څه باندې یوملیارد ډالرو په ارزښت تړون لاسلیک کړ.ده له هند سره د بریتانیا د اړیکو د لا پراختیا غوښتنه وکړه .
تبصرې (0)
ملګري ته ووایاست
چاپ
