- د امریکا لویه څارنوالي د افغانستان د جګړې د رازونو د افشا کوونکو په باب پلټنه کوي

د امریکا لوی څارنوال

تاند(بنجشنبه/جولای۲۹) د امریکا لوی څارنوال ایریک هولډر وايي د دفاع وزارت(پینتاګون) او د عدلیې وزارت له لوري پلټنې به دا مالومه کړي چې ایا د افغانستان د جګړې د پټو رازونو د افشاکوونکو په خلاف دوسیه درج کړي او کنه .

دا په داسي حال کې ده چې د ویکي لیکس اډیټر ویلي چې د ده موسسه نه پوهېږي چې چا دوی ته د امریکا د پوځ ۹۱ زره پټ سندونه لېږلي دي.

خو د امریکا لوی څارنوال ښاغلي هولډرد چهارشنبې په ورځ د مصر د سفر په ترڅ کې وویل تحقیقات په دې هدف پیلېږي چې د دغو اسنادو افشا کوونکې سرچینه افشا کړي.

ده همداراز وویل چې په دې باب به له پلټنو او ګروېږنو وروسته پرېکړه وشي چې د افشا کوونکي پر خلاف جنايي دوسیه درج شي او کنه .

ده دا هم وویل چې دی په دې مسله خواشینی دی ځکه چې دا د امریکا د متحدوایالتونو د ملي ګټو خلاف ده.

د امریکا د دفاع وزارت او پوځ په یو نوي(۹۱)زره سندونو کې په زغرده ښکاره شوې چې د پاکستان پوځ او استخبارات د طالبانو ملاتړ کوي .

د پینتاګون ویندوی جیف موریل د سې شنبې په ورځ وویل چې دفاع وزارت(پنتاګون)د ویکي لیکس له لوري د افغانستان د جګړې د پټو اسنادو د افشا کېدو په باب پراخې پلټنې پیل کړي دي.

د امریکا ولسمشربارک اوباما ویلي چې په دې اسنادو کې نوې خبره نشته بلکې ټولې هماغه خبرې دي چې بیا بیا شوی دي.که څه هم د ښاغلي اوباما خبره دقیقه ده خود امریکا او لوېدیځ عامه افکار د لومړي ځل لپاره په دې خبرېږي چې د دوی حکومتونه هغه هیواد ته په ملیاردونو ډالره مرسته ورکوي چې په پټه د دوی د دښمنانو ملاتړ کوي.