 |
| جوبایډن |
تاند(جمعه/جولای۳۰) د امریکا مرستیال ولسمشرجوبایډن د پنجشنبې په ورځ په یوه مرکه کې وویل چې د پاکستان استخباراتي شبکه آی ایس آی د ویکي لیکس له لوري د پټو سندونو له خپرېدو وروسته د افغانستان په وړاندې په خپل سلوک کې تغییر راولي.
پاکستان د ویکي لیکس له لوري د خپرو شویو اسنادو په خپرېدو پسې له سختو نړیوالو انتقادونو او حتي سپکو سپورو سره مخامخ شوی تر دې چې خپل متحدان یې دوه مخی بولي .
پاکستان د ویکي لیکس اسناد غیرمسوولانه او د یوې سرچینې شواهد بولي خو د امریکا پوځ او حکومت چې په ظاهره د دې اسنادو په خپرېدو او افشا کېدو خوابدې دي ، د ویکي لیکس له لوري خپاره شوي اسناد نه ردوي.
جوبایډن هم دا سندونه ،چې د ۲۰۰۴ او۲۰۰۹ ترمنځ وخت سره تړاو لري او ښيي چې د پاکستان استخبارات افغان طالبانو ته وسلې،پیسې او روزنه ورکوي ،د ولسمشراوباما په شان عادي وبلل .اوباما ویلي وو چې په دې سندونو کې نوې خبره نشته یعنې دا خبرې پخوا بیا بیا شوي دي.
بایډن وویل چې په دې سندونو کې آی ایس آی د ستونزې سرچینه بلل شوې ، دا مشکل پخوا هم مطرح شوی دی او دا داسي ستونزه ده چې موږ ورسره مقابله کوو او د بدلېدو په حال کې ده.
پاکستان د دغو سندونو خپرېدا غندلې او ویلي یې دي چې دا هیواد ځان له ترهګرۍ سره مبارزې ته ژمن ګڼي. پاکستاني کارپوهانو ویلي چې دا سندونه زاړه دي خو د افغانستان ولسمشرویلي چې نړیوال ځواکونه دې د افغانستان د کلیو د بمباري کولو پرځای د پولې پورې غاړه د ده په وینا د تروریستانو ځالې په نښه کړي.
بایډن: موږپه افغانستان کې د دولت جوړولو نیت نه لرو
د امریکا مرستیال ولسمشرجوبایډن د پنجشنبې په ورځ وویل چې متحد ایالتونه په افغانستان کې د دې لپاره حضور نه لري چې دولت جوړ کړي بلکې د دې لپاره دي چې د پاکستان په پولو کې القاعده ماته کړي.
د ولسمشربارک اوباما حکومت د افغانستان د نهه کلنې جګړې په خاطر چې په امریکا کې نور ملاتړ نه لري او لګښتونه یې هم ډېر زیات شوي له دې جنجال سره مخامخ دی چې په دسمبر میاشت کې په څه ډول ووايي چې د افغانستان لپاره د ولسمشربارک اوباما نوې ستراتیژۍ اغېزمنه وه .
بایډن وویل چې د دوی هدف دا نه دی چې په افغانستان کې د امریکا په شان ولسواکي رامنځته کړي بلکې د دوی هدف دا دی چې القاعده ورکه کړي چې د ۲۰۰۱ کال د سپټمبرپه یوولسمه یې پر امریکا بریدونه وکړل.
ده وویل :« موږ په افغانستان کې د یوه هدف لپاره حضور لرو چې القاعده له منځه یوسو چې د افغانستان او پاکستان ترمنخ په غرونو کې مېشته ده.کنې موږ هلته د دې لپاره ځواکونه نه دي لېږلي چې دولت جوړ کړو یا د جیفرسن دیموکراسي راولو یا دا هیواد جوړ کړو.موږ دا خبره سپینه کړې ،موږ هلته د لسو کالو لپاره نه پاته کېږو.»
تبصرې (0)
ملګري ته ووایاست
چاپ
