 |
| ګېټس : «د دغو اسنادو خپرېدا ممکن د نړۍ په دې کلیدي سیمه کې زموږ شهرت اواړیکو ته زیان واړوي.» |
تاند(جمعه/جولای۳۰) د امریکا دفاع وزیر رابرت ګېټس د افغانستان د جګړې په باب د ویکي لیکس له لوري په بې ساري ډول د څه باندې نوي زره سندونو د خپرېدا په اړه وویل چې دا مسله کېدای شي د امریکايي پوځیانو او د هغوی د متحدانو لپاره سخت عواقب ولري او ممکن د خلکو د ژوند په بیه تمامه شي.
ګېټس د امریکا د ملي امنیت د حساسو سندونو د افشا په مخنیوي کې د پاتې راتلو په ځواب کې وویل چې پینتاګون اوس هڅه کوي چې نور لا ډېر حساس اسناد او شواهد خوندي کړي .
ده په واشنګټن کې یوې خبري غونډې ته وویل : «د جګړې په میدان کې به د دغو اسنادو د خپرېدا پایلې لا سختې او زموږ د ځواکونو ، ايتلافیانو اوافغان متحدانو لپاره خطرناکې وي او ممکن د نړۍ په دې کلیدي سیمه کې زموږ شهرت اواړیکو ته زیان واړوي.»
د امریکا لوی درستیز مایک مولن وویل چې د دې سندونو د افشا کوونکو لاسونه به ممکن له اوسه د ځینو ځوانو سرتېرو(امریکايي)یا افغان کورنیو په وینو ککړ شوي وي.
پاکستان د ویکي لیکس له لوري د خپرو شویو اسنادو په خپرېدو پسې له سختو نړیوالو انتقادونو او حتي سپکو سپورو سره مخامخ شوی تر دې چې خپل متحدان یې دوه مخی بولي .
پاکستان د ویکي لیکس اسناد غیرمسوولانه او د یوې سرچینې شواهد بولي خو د امریکا پوځ او حکومت چې په ظاهره د دې اسنادو په خپرېدو او افشا کېدو خوابدې دي ، د ویکي لیکس له لوري خپاره شوي اسناد نه ردوي.
تبصرې (0)
ملګري ته ووایاست
چاپ
