 |
| په اروزګان کې د هالنډي ځواکونو پر اډې د دغه هیواد بیرغ رپېږي |
تاند(جمعه/جولای۳۰) د هالنډ یوې ورځپاڼې راپور ورکړ چې طالبانو له افغانستان څخه د هالنډي ځواکونو د وتلو په اړه د هالنډ د حکومت د پریکړې هرکلی کړی.
د طالبانو ویاند قاری یوسف احمدي، د هالنډ فولکس کرانت ورځپاڼې ته ویلي، طالبان د زړه له کومې، د هالنډ د حکومت د دې پریکړې هرکلی کوي او مبارکي ورته وایي.
په افغانستان کی د دېره، شاوخوا دوه زرو هالنډي عسکرو د ماموریت موده د راتلونکي یکشنبې په ورځ پاي ته رسیږي.
دې ځواکونو څلور کاله وړاندي په افغانستان کې خپل پوځي ماموریت پیل کړی و. ناټو له هالنډ څخه غوښتي چې په افغانستان کې دې خپل پوځي ماموریت د ۲۰۱۱ کال د آګست ترمیاشتې پورې وغځوي.
په افغانستان کې ۲۴ هالنډي عسکر وژل شوي دي.هالنډي پوځیان په اروزګان ولایت کې مېشت دي او ټاکل شوې ده د هغوی ځای امریکايي پوځیان ونیسي.
کاناډا هم ویلي چې له افغانستانه خپل ځواکونه باسي .کاناډايي پوخیان په کندهار کې دېره دي.
بریتانیا بیا ویلي چې له څلورو تر پنځو کلونو پورې به له افغانستانه خپل ټول محارب پوځیان وباسي او امریکا بیا ویلي چې د راتلونکي(۲۰۱۱) کال له جولای څخه به د خپلو ځواکونو په ایستلو پیل وکړي .
طالبانو د امریکا د دې اعلان هرکلی نه دی کړی خو د حکمتیار د حزب اسلامي ډلې د اوباما د پرېکړې هرکلی کړی وو او ویلي وو چې د همدې اعلان په خاطر حاضره شوه چې یو پلاوی د خبرو لپاره کابل ته واستوي.
تبصرې (0)
ملګري ته ووایاست
چاپ
