تاند(بنجشنبه/جولای۲۹) د ایټالیا دفاع وزارت وویل چې پرون(چهارشنبه)د دوی دوه عسکرپه افغانستان کې د سړک د غاړې په چاودنه کې لږ وروسته له دې ووژل شول چې هغوی دې ته ورته یوه بله چاودېدونکې وسیله شنډه کړه.
له روم څخه د تاند د راپور له مخې د ایټالیا صدراعظم سیلفیوبرلوسکوني د وژل شویو عسکرو د کورنۍ له غړیو سره خواخوږي څرګنده کړه خوپه عین حال کې یې په دې ټینګار وکړ چې په افغانستان کې د ایټالیايي پوځیانو شتون ضروري دی.
د ایټالیا دفاع وزارت په یوه خپره کړې خبرپاڼه کې ویلي چې د افغانستان په هرات کې دوه بم شنډونکي ایټالوي ماهران وروسته له دې وژل شوي چې دوی دې ته ورته نور چاودېدونکي مواد په بري سره شنډ کړل.
د ایټالیا د پارلمان ولسي جرګې او همداراز مشرانو جرګې د دې پېښې په خاطریوه دقیقه چوپتیا غوره کړه.
ایټالیا په افغانستان کې د ناټو ترمشرۍ لاندې د نړیوالو ځواکونو (ایساف) په چوکاټ کې درې زره درې سوه(۳۳۰۰) عسکر لري چې په هرات او کابل کې دېره دي.
له دغو دوو عسکروسره تراوسه پورې ۲۹ تنه ایټالیايي پوځیان په افغانستان کې وژل شوی دي.
تبصرې (0)
ملګري ته ووایاست
چاپ
