تاند(پنجشنبه/جولای ۲۸) د غزني ولايت چارواكي وايي، چې نن په دوو جلا چاودنو کې، د يوې شخصي امنيتي كمپنۍ 8 تنه ساتونكي وژل شوي دي.
د غزني امنيه قومندان خيال باز شيرزوى وايي چې، لومړى چاودنه د كابل - كندهار پر لويه لار وسوه چې پنځه تنه په کې ووژل شوي اودوهمه چاودنه په غزني ښار کې د همدې امنيتي كمپنۍ پر بل موټر شوې او درې تنه يې ووژل.
وسلوالو طالبانو ددغو چاودنو مسئوليت منلى او ادعا یې كړې چې په دواړو پيښو كي يې11 تنه وژلي دي.
د غزني چارواكو دا خبره رد كړې ده.
بل خوا د پكتيا ولايت يو چارواكي چې د نوم له ښوولو يې ډډه وكړه ازادۍ راډيو ته وويل چې نن سهار ددې ولايت د سټو كنډو په سيمه كي د سړك جوړوني د هندۍ كمپنۍ پرساتونكو د ماين چاودنه شوې چې اوه تنه يې ټپيان كړي دي.
خو طالبانو رسنيو ته ویلي چې په دغه چاودنه کې يې 7 وژلي او ټپي كړي.
چارواكو دا ادعا رد كړې.
تبصرې (0)
ملګري ته ووایاست
چاپ
