دوشنبه, نوومبر 29, 2021
Homeخبرونهد کډوالۍ نړیوال سازمان: ښايي میلیونونه افغانان له قحطۍ سره مخامخ شي

د کډوالۍ نړیوال سازمان: ښايي میلیونونه افغانان له قحطۍ سره مخامخ شي

تاند (دوشنبه د دلوې ۲۷) د کډوالۍ نړیوال سازمان وايي، ښايي په افغانستان کې سږ کال ۱۷ میلیون افغانان د لوږې له خطر سره مخامخ شي.

دغه سازمان پرون یکشنبه په یوه اعلامیه کې ویلي، د باران او واورې د کمیدو له کبله به خلک له لوږې او وچکالۍ سره مخامخ شي، نو باید د بشري مرستو د برابرولو لپاره تیاری ونیول شي.

د کډوالۍ نړیوال سازمان د بېړنیو حالاتو د مشر نیک بیشپ په خبره، د افغانستان زراعت د وچکالۍ او قحطۍ له کبله اغېزمن شوي ځکه چې سږکال واوره او باران ونشو، نو د مرستې برابرولو لپاره باید هڅې چټکې شي.

نوموړي دغه راز زیاته کړې ۱۷ میلیون افغانان چې ددې هېواد ۴۲ سلنه نفوس تشکیلوي لوږه به یې اغیزمن کړي.

د کډوالۍ نړیوال سازمان وايي، په ۲۰۲۰ زېږدیز کال کې ګڼ شمېر افغانان چې شمېر یې میلیونونو تنو ته رسېږي خپل هېواد ته ستانه شوي او زرګونه نور د جګړو له کبله بې ځایه شوي چې اوسمهال له بېکارۍ سره مخامخ دي.

ددې سازمان د معلوماتو له مخې په افغانستان کې به کاري فرصتونه نور هم ستونزمن شي.

دې بنسټ په دوحه کې د افغان سولې خبرو ته په اشارې ویلي چې مذاکرات په ولاړ دي، تاوتریخوالی زیات شوی او د کارپوهانو د څرګندونو له مخې وچکالي هم روانه ده.

تر دې مخکې د ولسمشر غني دویم مرستیال سرور دانش هم د تېر کال په وروستیو کې ویلي و چې په افغانستان کې ۷۰ سلنه خلک د بې ‌وزلۍ تر کرښې لاندې ژوند کوي او شاوخوا ۱۳ میلیونه وګړي غذايي خوندیتوب نه‌ لري.

LEAVE A REPLY

Please enter your comment!
Please enter your name here

- Advertisment -

ادب