جمعه, مې 7, 2021
Homeخبرونهاقتصادي خبرونهکرنې وزارت: د تېر په پرتله هېواد کې د څرمن تولید ډېر...

کرنې وزارت: د تېر په پرتله هېواد کې د څرمن تولید ډېر شوی

تاند ( جمعه، د حمل ۲۰ )  د افغانستان د کرنې، مالداري او اوبو لګولو وزارت چارواکي وايي چې هېواد کې د تېر لمریز کال په پرتله د څرمن تولید ډېر شوی دی.

د دغه وزارت ویاند اکبر رستمي وایي، تیر لمریز کال هېواد کې د مختلفو څارویو څه باندې دوه میلیونه او ۷۸۴زره څرمن تولید شوې ده.

هغه وایي : ((له نیکه مرغه کال په کال د څرمنې تولیدولو ته زمینه پراخېږي… د تولید تر ټولو لویه کچه هم د هېواد په شمال کې ده.))

د نوموړي د معلوماتو له مخې، هرات، غزني، سرپل، پروان، بغلان، فاریاب، کندز، کندهار او فراه د څارویو د څرمنې د تولید اصلي ولایتونه بلل کیږي.

رستمي دغه راز زیاتوي چې تولید شوې څرمنې د قره‌قل، پسونو، غویانو، اوزو او ګیدړو دي.

دا په داسې حال کې ده چې د افغانستان څرمن په ځانګړي ډول د قره‌قل څرمن په هېواد او نورو هېوادونو کې ځانګړی شهرت لري.

د معلوماتو له مخې، د قرقل له څرمنې د قره‌قل خولیو او بالاپوشونو په جوړولو کې کار اخیستل کېږي چې د افغانستان په ګډون د سیمې په یو شمیر هېوادونو کې ترې استفاده کېږي.

دغه راز د نورو څارویو څرمن هم تر ډېره له هېواده بهر نورو هېوادونو صادرېږي او د بوټانو او جمپرونو په جوړلو او په ټوله کې د څرمنې په صنعت کې ترې کار اخیستل کېږي.

د افغانستان د کرنې، اوبو لګولو او مالدارۍ وزارت د معلوماتو له مخې، دا مهال په افغانستان کې شاوخوا ۳۰ میلیونه څاروي روزل او ساتل کېږي.

LEAVE A REPLY

Please enter your comment!
Please enter your name here

- Advertisment -

ادب