پنجشنبه, جون 24, 2021
Homeخبرونهنۍ: ښکېل اړخونه دې د رسنیو له ګواښلو لاس واخلي

نۍ: ښکېل اړخونه دې د رسنیو له ګواښلو لاس واخلي

تاند ( چهارشنبه، د ثور ۱۶)   د افغان خبریالانو د ملاتړ بنسټ (نۍ) ویلي چې دوی د طالبانو او دغه راز د افغانستان د ملي امنیت له لوري د خبریالانو او رسنیو په اړه خپاره شویو وروسیتو ګواښونو اندېښمن کړي دي.

دغې بنسټ زیاته کړې چې پر یو مهال د جګړې له دواړو لوریو څخه د رسنیو په اړه له ورته څرګندونو ښکاري چې په افغانستان کې د بیان د ازادۍ وضعیت ورځ تر بلې د ترینګلتیا پر لور روان دی.

د نۍ اندېښنه داسې مهال ده چې تازه طالبانو افغان رسنیو او خبریالانو ته خبرداری ورکړی دی چې که چېرته خپله بې طرفي ونه ساتي نو د دوی پر وړاندې د هر اقدام پړه به یې هم پر خپله غاړه وي.

د افغان خبریالانو د ملاتړ بنسټ همدا راز ویلي چې افغانستان کې ټولې رسنۍ د ژورنالیزم او د هېواد د نافذه قوانینو په رڼا کې فعالیت کوي او د هیچا په ګټه او زیان یې تبلیغات نه دي کړي.

یاد بنسټ زیاته کړې چې ورته څرګندونې په ټولنه کې د وېرې باعث کېږي او د رسنیو او خبریالانو ګواښل د جګړې د نړیوالو قوانینو خلاف عمل او جرم دی نو ښکېل اړخونه دې له ورته څرګندونو په کلکه ډډه وکړي.

ورته مهال د افغانستان د ملي امنیت د رئیس له خولې ویل شوي چې د ولسي جرکې په یوه سري غونډه کې یې د طالبانو په ګټه د یو شمېر خبریالانو او شنونکو کړنې نه زغمونکي ګڼلي دي.

د افغانستان د ولسي جرګې یوه غړي عارف رحماني د ملي امنیت د رییس له خولې پر خپله ټوېټر پاڼه ادعا کړې چې ضیا سراج د ولسي جرګې په یوه سري غونډه کې ویلي، “د طالبانو په ګټه د یو شمېر ټلوېزیونونو تبلیغات ټکان ور کوونکي دي.”

د افغانستان د ملي امنیت ادارې د ولسي جرګې د یاد غړي د څرګندونو په غبرګون کې ویلي چې د بیان ازادۍ په هکله د دې ادارې د مشر خبرې له ”لاسوهنې وروسته، له واقعیته په لېرې او یو لوریز ‌ډول ” پارلمان کې وړاندې شوې دي.

د دغې ادارې په اعلامیه کې زیاته شوې: ”ملي امنیت اداره رسنۍ د تېرو ۲۰ کلونو لاسته راوړنو اصلي ساتونکي بولي او د امنیتي ادارو او رسنیو تر منځ د دوه اړخیزو اړیکو ساتونکي دي. ”

دا په داسې حال کې ده چې له افغانستانه د بهرنیو ځواکونو د وتلو په ترڅ کې په هېواد کې سیاسي وضعیت ډېر حساس شوی او پر خبریالانو رواني فشارونه ډېر شوي دي.

LEAVE A REPLY

Please enter your comment!
Please enter your name here

- Advertisment -

ادب