دوشنبه, جولای 26, 2021
Homeخبرونهاقتصادي خبرونهد «شاه او عروس» په بند کې د اوبو ذخیره پيل شوه

د «شاه او عروس» په بند کې د اوبو ذخیره پيل شوه

تاند ( چهارشنبه؛ د سرطان ۲) د اوبو چارو د تنظیم ملي اداره وایي، په کابل کې د « شاه او عروس » بند چارې پای ته ورسېدې او ژر به یې د پرانیستې مراسم هم ترسره شي.

د یادې ادارې ویاند نظام الدین خپلواک تاند وېب پاڼې ته وویل، چې له شاوخوا یوې لسیزې وروسته د شاه او عروس په بند کې د اوبو د ذخيره کولو پروسه تېره شپه پیل شوه.

یاد بند د کابل ولایت په شکر درې سیمه کې موقعیت لري.

د اوبو چارو د تنظیم ملي اداره وایي، د شاه و عروس بند د دې ادارې یو له سترو پروژو دی، چې د ۱.۲ مېګاواټه بريښنا د تولید ظرفیت لري او ۲۷۰۰ هکټاره کرنیزه ځمکه خړوبوي دغه راز ۹ میلیونه متر مکعب اوبو د ذخیره کولو وړتیا لري.

سرچینه وایي، چې د دې بند په پرانیستې سره به سلګونه ځوانانو ته د کار زمینه برابره شي.

د دغه بند د رغولو چارې په ۱۳۹۱لمریز کال کې پیل شوې او تمه وه چې په ۳ کلونو کې بشپړې شي، خو دا نېټه تر ننه را وغځېده.

د افغانستان د اوبو د تنظیم ملي اداره د دې ځنډ لامل د تړون کوونکو کمپینو له‌خوا غیر معیاري کار او د ځمکې استملاک بولي، خو زیاتوي، تېر یو نیم کال کې پر دې پروژې کار چټک شو.

د دې بند د بشپړېدو خبر داسې مهال خپرېږي چې همدا اوس کابل مېشتي ښاریان د څښاک لپاره پوره پاکې اوبه نه ‌لري او پر دې ښار را وارداتي برښنا هم د درې ورځو په مخ پرې شوې ده.

کابل مېشتي خوښ دي چې د شاه و عروس بند به په دې دوو برخو کې لږ تر لږه د دوی یو څه ستونزې حل کړي.

LEAVE A REPLY

Please enter your comment!
Please enter your name here

- Advertisment -

ادب