دوشنبه, نوومبر 29, 2021
Homeخبرونهدانش: د دوحې وروستۍ خبرې په تشه اعلامیه پای ته ورسېدې

دانش: د دوحې وروستۍ خبرې په تشه اعلامیه پای ته ورسېدې

تاند(دوشنبه، د سرطان ۲۸) د افغانستان د ولسمشر دوهم مرستیال وايي، د قطر د دوحې دوه ورځنۍ خبرې بې کومې نتیجې او یوازې په یوه تشه اعلامیه پای ته ورسېدې.

سرور دانش نن (دوشنبه) وویل«د افغانستان د حکومت د جګپوړي پلاوي او طالبانو وروستیو خبرو کومه پایله نه لرله او یوازې په یوه خالي بیان پای ته ورسېدې. موږ پر نړیوالې ټولنې او هغو هیوادونو، چې د طالبانو ملاتړ کوي، ږغ کوو چې دا ډله ګټورو او رغنده خبرو ته وهڅوي.»

د دوحې په وروستیو خبرو کې دواړو خواوو د خبرواترو پر دوام سلا وکړه خو د دوی په پرېکړه لیک کې نه د اوربند یادونه شوې او نه د اورکم.

د دوی د پرېکړه لیک یوازینی د پام وړ ټکی دا دی چې د ملکیانو ژوند او ټولګټو تاسیساتو ته به پام کوي. په تېرو دوو میاشتو کې د سلګونو ولسوالیو ودانۍ او نور تاسیسات ویجاړ شوي او سلګونه ملکیان وژل شوي دي.

د افغانستان د دولت او طالبانو د استازو ترمنځ خبرې د تېر کال له سپټمبره پیل شوي خو هیڅ پرمختګ پکې نه لیدل کېده؛ په وروستیو ورځو کې د سولې د ملي مصالحې د عالي شورا د رييس عبدالله عبدالله په مشري یو پلاوی قطر ته لاړ او د دې ډلې د قطر له مشر او نورو مشرانو سره یې خبرې پیل کړې. هیله وه چې د دوی خبرې به جدي وي او هغه ولاړه پروسه به چټکه کړي چې د تېر کال له سپټمبره راهیسې په ټپه ولاړه ده.

داسې ښکاري چې په وروستیو کې د جګړې په میدان کې د طالبانو چټک پرمختګونه سبب شوي چې سوله ییزې حللارې ته د دې ډلې لېوالتیا کمه شي.

LEAVE A REPLY

Please enter your comment!
Please enter your name here

- Advertisment -

ادب