یکشنبه, اکتوبر 17, 2021
Homeخبرونهاترا ادارې د برېښنايي تعلیم پر لارو چارو کار پيل کړ

اترا ادارې د برېښنايي تعلیم پر لارو چارو کار پيل کړ

تاند ( چهارشنبه، د اسد ۱۳) د مخابراتي خدمتونو د تنظیم ادارې (اترا) او د پوهنې وزارت مسوولان هڅه کوي، څو په هېواد کې د برېښنايي تعلیم لپاره زمینه برابره کړي او پر وړاندې یې شته ستونزې له منځه یوسي.

یاد دواړو ادارو په همدې تړاو د همغږۍ ناسته هم ترسره کړه.

د اترا عمومي رئیس عمر منصور انصاري په دې ناسته کې وویل، دوی په پنځو ملي برنامو کار کوي، چې یوه مهمه هغه یې د برېښنايي تعلیم لپاره د اسانتیاوو برابرول دي.

د نوموړي په خبره دوی د دې برنامې د ښه تطبیق په برخه کې د پوهنې، تخنیکي زده کړو او لوړو زده کړو له ادارو سره له نږدې کار کوي، څو اړتیاوو ته په کتو وړاندې لاړ شي.

د ښاغلي انصاري په خبره د برېښنايي تعلیم په ملي برنامه کې به د پوهنې، تخنیکي او لوړو زده کړو برخه کې د انلاین، ډیجیټالي محتویاتو، ډیجیټالي مهارتونو، E-MIS، زېربنا او له انټرنېټ سره د تعلیمي بنسټونو وصلولو چاره شامله وي.

دا هڅه وروسته له هغې پيلېږي، چې په هېواد کې د کورونا ویروس له رامنځته کېدو سره سم ټول تعلیمي مراکز رخصت شول خو زده کړیالان یې بې زده کړو پاتې شول.

یو شمېر تعلیمي ادارو د آنلاین زده کړو په نوم تدریس پيل کړی وو خو زده کوونکو نیوکه درلوده، چې دوی ورته لاسرسی نه لري.

د اترا اداې د معلوماتو له مخې دې ادارې تر دې وړاندې په کورونا وضعیت کې د لوړو زده کړو، تخنیکي زده کړو او پوهنې برخه کې د انلاین محتویاتو لپاره د انټرانېټ محلي او وړیا شبکه (e-Learn) رامنځته کړې  ده.

د اترا مسوولان وایي، چې اوسمهال د هېواد ۱۵۱ ښوونځي له نوري فایبر او۲۵۰ ښوونځي یې له (P2P) انټرنېټ سره وصل کړي او دغه راز ۱۱۲ ښوونځیو ته یې د آی ټي لېب تجهیزات برابر کړي دي.

دغه راز د هېواد ۴۳ پوهنتونونه، کمپسونه او پوهنځي یې هم له نوري فایبر سره وصل کړي او ګڼې نورې پروژې یې هم تر کار لاندې دي.

1 COMMENT

LEAVE A REPLY

Please enter your comment!
Please enter your name here

- Advertisment -

ادب