پنجشنبه, جنوري 27, 2022
Homeخبرونهظریفه غفاري: نړیوال دې په قطر کې د طالبانو دفتر زر وتړي

ظریفه غفاري: نړیوال دې په قطر کې د طالبانو دفتر زر وتړي

تاند( دوشنبه، د سنبلې ۲۹مه) د افغانستان د میدان وردګو ولایت مخکینۍ ښارواله ظریفه غفاري، چې د جمهوري نظام له ړنګیدو سره د فرانسې پلازمېنې پاریس ته تلې، له هغه ځایه د  افغان ښځو د غږ پورته کولو لپاره د مبارزې خبر ورکړی.

نوموړې له افغانستان انټرنیشنال ټلویزون سره په یوه ځانګړې مرکه کې له هېواده د وتو د مجبوریتونو او خاطرو د بیانولو ترڅنګ د طالبانو د مهارولو لپاره له نړیوالې ټولنې څخه خپلې غوښتنې مطرح کړې.

مېرمن غفاري وویل: طالبان د امریکا د یوې ناوړه معاملې په پایله کې لکه اټوم بم تبلیغ او په زوره پر افغانستان وتپل شول، اوس په کار ده چې نړیوال یې په رسمیت ونه پېژني، د قطر دفتر یې وتړي او په نړیوال تور لیست کې یې د مشرانو نومونه خوندي وساتي.

دغې افغان فعالې د امریکا متحده ایالاتو ترڅنګ پر افغان سیاستوالو او چارواکو هم نیوکه وکړه، چې له فرصتونو یې سمه ګټه وانخیسته او د ترهګرۍ پر وړاندې یې مسوولانه او سمه مبارزه ونه کړه.

هغه په ورته وخت کې زیاتوي، چې نړیوال دې له افغان ولس سره د طالبانو په لاس نه؛ بلکې په مستقیم ډول بشري مرستو ته دوام ورکړي.

ظریفه غفاري په دې مرکه کې دا هم وویل، چې د طالبانو پر وړاندې له افغان ولس سره د نړۍ متحد کیدل به پر افغانانو احسان او خیرات مصرفول نه وي، ځکه د دې ډلې د واکمنۍ او ظلمونو له دوام سره به افغانستان بیا د نړیوال تروریزم په مرکز بدل او ټوله نړۍ ترې وګواښل شي.

د طالبانو د قطر دفتر چې څو کاله وړاندې له امریکا متحده ایالاتو سره د دغې ډلې د مذاکراتو په پایله کې پرانیستل شو، تراوسه لا پرانیستی او دوی ترې له نړۍ سره د خپل تازه جوړ شوي حکومت ترینګلې اړیکې سمبالوي.

1 COMMENT

LEAVE A REPLY

Please enter your comment!
Please enter your name here

- Advertisment -

ادب