یکشنبه, اکتوبر 17, 2021
Homeخبرونهد پاسپورټونو د وېش د بیا پيل هیله مندي؛ نوی سرپرست رئیس...

د پاسپورټونو د وېش د بیا پيل هیله مندي؛ نوی سرپرست رئیس یې وټاکل شو

تاند( دوشنبه، د سنبلې ۲۹مه) د طالبانو اسلامي امارت نن د افغانستان د پاسپورټ ریاست ته نوی سرپرست ټاکلی، چې ورسره د پاسپورټونو د وېش د بیا پیلیدو هیله مندي رامنځته شوې ده.

د یاد شوي ریاست په یوه اعلامیه کې راغلي، چې نوی ټاکل شوی سرپرست یې مولوي عالم ګل حقاني نومیږي او نن یې رسماً خپله دنده پيل کړه.

نوي رئیس د معرفۍ په مراسمو کې یې ژمنه کړې، چې د فساد پر وړاندې مبارزه او شفافیت ته به کار کوي.

 طالبانو مولوي عالم ګل حقاني د افغانستان پاسپورټ ریاست عمومي چارسمبالی مشر په توګه وټاکه، خو لا هم د دې ریاست چارې پیل شوې نه دي.

د مولوي حقاني په اړه ویل شوي، چې د طالبانو په تیره واکمنۍ کې د ملکي هوایي چلند ادارې او دغه راز د هوټلونو تصدۍ عمومي رئیس پاتې شوی. دغه راز یې په پکتیا او پکتیکا کې د ښاروال په توګه کار کړی او په وروستیو کې د طالبانو د ښوونې، روزنې اولوړو زده کړو د کمیسیون مشر و.

هغه په داسې وخت پر نوې دندې ټاکل شوی، چې ګڼ افغانان د مخکیني حکومت له سقوط وروسته د پاسپورټونو د وېش بهیر د ودریدو له کبله شکایت لري.

څه موده مخکې د پاسپورټ ریاست کارکوونکو د یوې غونډې پرمهال وویل، چې د پاسپورټونو وېش ته چمتو دي او په دې اړه د طالبانو د امارت پریکړې ته انتظار کوي.

طالبانو نه دي ویلي، چې ولې یې د پاسپورټونو د وېش بهیر درولی؟

ویل کیږي، چې د دې کار دلیل ظاهراً له هېواده د وتونکو ګڼو افغانانو د وتو پر وړاندې خنډ جوړول دي.

د طالبانو له واکمنیدو سره ګڼ افغانان د سمدستي زیات شوي فقر او ګونګ راتلونکي له وېرې د هېواد پریښودو په تکل کې دي.

له دې سره ویل کیږي، چې د پاسپورټونو د وېش ځنډیدو له کبله په تور بازار کې په لوړه بیه د افغاني پاسپورټونو بازار ګرم دی او تر یو نیم زر ډالرو پورې د یوه پاسپورټ بیه ده.

1 COMMENT

  1. د اسلامی امارت زیاتره لوړپوړی مقرری د لویی پکتیا او لوی قندهار د خلکو ځخه وشوی. کیدایشی دا به هم د دوی په اسلام کی ویل شوی وی،

    پخوانی اسلامی جمهوری حکومت کی زیاتره لوړپوړی مقرری به د پنجشیر اولسوالی، لوګر او قندهار څخه کیدلی کیداشی دا به هم د هغوی په جمهوریت کی ویل شوی وه،

    عجب اسلام او عجب جمهوریت هغه هم په افغانستان کی؟؟؟؟؟؟؟ آیا په نوره نړی کی اسلام او جمهوریت د افغانستان د اسلام او جمهوریت سره فرق کوی او که ځمونږ افغانان په اسلام او جمهوریت نه پوهیږی ؟؟؟؟؟؟؟
    والسلام

LEAVE A REPLY

Please enter your comment!
Please enter your name here

- Advertisment -

ادب