سه شنبه, دسمبر 7, 2021
Homeخبرونه‏د ملا متقي په مشرۍ طالب پلاوی ترکیې ته تللی

‏د ملا متقي په مشرۍ طالب پلاوی ترکیې ته تللی

تاند:( پنجشبه، د ميزان دوه ویشتمه) د طالبانو د بهرنیو چارو وزارت د سرپرست مولوي امیرخان متقي په مشرۍ د دوی یو لوړپوړی پلاوی له دوحې څخه د ترکیې د پلازمېنې انقرې پر لور خوځیدلی.

د طالبانو مطبوعاتي سرچینو ویلي، چې دغه سفر د ترکیې د بهرنیو چارو د وزیر چاوش داود اوغلو په بلنه ترسره شوی.

په دې پلاوي کې د طالبانو یو شمېر نور چارواکي هم شامل دي.

یاد شوی پلاوی څو ورځې مخکې د امریکا متحده ایالاتو، قطر او اروپایي ټولنې له هیئتونو سره د خبرو په هدف د قطر پلازمېنې دوحې ته تللی و.

د دې سفر په ترڅ کې طالب لوري د بېلا بېلو موضوعاتو په اړه له یادو لوریو سره ولیدل او د افغانستان د بشري بحران او د نړیوالو د اندیښنو په اړه یې خبرې ورسره وکړې.

ترکیې ته یاد شوی سفر په داسې مهال کیږي، چې پرون د ترکیې د بهرنیو چارو وزیر چاوش داود اوغلو په نیږدې راتلونکي کې کابل ته د یو شمېر اسلامي هېوادونو د بهرنیو چارو د وزیرانو په ملتیا د خپل سفر اعلان وکړ.

له ترکي وزیر سره د اندونیزیا د بهرنیو چارو وزیره هم د یاد شوي سفر د اعلان پر وخت حاضره وه.

اندونیزیایۍ وزیره، چې د نړۍ د تر ټولو لوی اسلامي هېواد دیپلوماتیکه دستګاه رهبري کوي، ویلي، چې کابل ته د سفر پرمهال به طالبان وهڅوي څو له ښځینه وو څخه د زده کړو، کار او نورو فعالیتونو اخیستل شوي حقونه بیرته ورکړي.

ترکیې د دې ترڅنګ په افغانستان کې د ټول شموله نظام په جوړیدو ټینګار کړی.

د افغانستان د پرځول شوي جمهوري نظام یوه لویه برخه چارواکي او نور ګڼ سیاستوال هم له نظام پرځیدو وروسته ترکیې ته تللي.

معلومه نه ده، چې د طالبانو پلاوی خو به په رسمي یا نا رسمي ډول له افغان سیاستوالو سره لیدنې کتنې لري کنه؟

LEAVE A REPLY

Please enter your comment!
Please enter your name here

- Advertisment -

ادب