چهارشنبه, دسمبر 1, 2021
Homeخبرونهطالبانو ازبکستان ته د خپل پلاوي د سفر جزييات رسنيز کړل

طالبانو ازبکستان ته د خپل پلاوي د سفر جزييات رسنيز کړل

تاند:( يکشنبه، د ميزان پينځه ويشتمه)‏ د طالبانو د اسلامي امارت ، يو لوړ پوړی پلاوی چې پرون په یوه ورځینی سفر ازبکستان هیواد ته تللی و، بیرته کابل ته راوګرځېد.

د‌ دغه پلاوي مشري د طالبانو د رئيس الوزرا مرستيال مولوي عبد السلام حنفي کوله.

د طالبانو د اعلامیې له مخې، په دغه پلاوي کې د سوداګرۍ، اقتصاد، عامې روغتيا، هوانوردۍ، لوړو زده کړو وزيران، د چارو ادارې لوی رئيس، د بهرنيو چارو وزارت، ملي دفاع وزارت، امنيتي سکتور او د ملي سوداګرو استازي شامل وو.

طالب پلاوي له ازبکستاني لوري سره د دوه اړخيزې سوداګرۍ په پراختيا، په ځانګړې توګه په راتلونکي ژمي کې سون‌توکو او لومړنيو اړتياوو کې زياتوالی، افغان سوداګرو لپاره په ټرانزيټ کې اسانتياوې، روغتيايي سکتور کې همکاري، د سرخان-پلخمري ۵۰۰ کيلو ولټ برېښنا مزي او مزارشريف-کابل-پېښور رېل پټلۍ په باب هر اړخيزې خبرې ترسره کړې.

طالبان وايي، چې دا خبرې اترې د ملا حنفي او د ازبکستان د لومړي وزیر مرستیال عمرزاکوف په ويناوو پيل شوې.

وروسته د دواړوغاړو تخنيکي ټيمونو د دواړو هېوادونو د لیوالتیا وړ مسايلو پر جزئياتو تفصيلي خبرې وکړې.

د دواړو مشرانو په لارښوونه، د دواړو لوريو ترمنځ په ګڼو برخو کې ګډ کاري ټيمونه رامنځ ته شول.

 دغه کاري ټيمونه به پر اړوندو موضوعاتو خبرې کوي او خپلو-خپلو مشرانو ته به د راتلونکو ګامونو لپاره لارنقشې وړاندې کوي.

د طالبانو د ویاند ذبیح الله مجاهد په وينا، راتلونکو لسو ورځو کې به لارنقشې بشپړېږي او د دواړو غاړو مشرانو ته به د پرېکړو لپاره وړاندې کېږي.

د مذاکراتو په پای کې هيله ښودل شوي، چې د دواړو غاړو کاري ټيمونه اړوندې چارې ژر بشپړې کړي او عملي ګامونه پورته کړي.

دا د طالبانو له واکمنیدو څخه وروسته، یوه بهرني هیواد ته د دوی د تر ټولو لوړ پوړي پلاوي لومړنی سفر دی.

د ازبکستان ترڅنګ د نړۍ هیڅ هېواد، ان د طالبانو تر ټولو اساسي ملاتړي پاکستان لا د دې ډلې رژيم په رسميت نه دی پېژندلی.

1 COMMENT

  1. دا عجیبه خبر دی ، داسی خبر ډ افغانستان د ملت سره د پاکستان په هکله ډیر سوالونه را منځ ته کولای شی ، چه پاکستان باید د طالبانو د مشرانو به هکله چه یا یی وژلی ، یا یی په زندانونو کښی شکنجه کړی ، او تر اوسه د بعضو مړی او ژندی یی لا درکه ساتلی هم ځواب ووایی ، دا د افغانستان د ملت حق دی او د طالبانو د اسلامی تحریک حق هم دی چه دغه سوالونه د پاکستان نه مطرح او د پاکستان د چارواکو په خاصه توګه د پاکستان د نظامی او استخباراتی چارواکو څخه ددغه حقوقی پوښتنو روغ او قانونی ځواب وغواړی ، د پاکستان ددولت نظامیان څه حق لری چه د افغانانو مشران وژنی ، ترور کوی ، زندانی کوی ، شکنجه کوی ، د افغانستان ملت ، او د پاکستان ولسونه ، مسلمان ملکونه او د حقوق بشر مدعی دولتونه باید پوښتنه وکړی چه د پاکستان نظامیانو د ملا محمد عمر مجاهد ، ملا بورجان ، ملا منصور ، ملا برادار ، ملا عبدالسلام ضعیف ، ملا دادالله ، ملا هیبت الله ، استاد یاسر او…… داسی نورو افغانی آزادی خواهانو چه د خپل ملک د اشغال په ضد یی تلاش درلود ، څه وکړل ، اوولی ، باید د هغو د مرګ او ژوند په هکله د افغانستان ملت ته ځواب ووایی ، پاکستان حق نه لری چه افغانان په خپلو زندانونو کښی وساتی ، که یی جرم کړی وی باید د افغانستان امارت اسلامی ته یی و سپاری ، یا ژوندی او یا یی مړی ! ددی نه بغیر د پاکستان د ښمنی د دوستی تر پردی لاندی په هیڅ ډول د افغانستان مجاهد ملت ته د منلو وړنه وه او نه ده ، د منلو وړ څه چه د انتقام وړ ده ، او دغه انتقام د افغانستان ملت په آسانی د پاکستان د حکومت څخه هر وخت اخیستلای شی ، په تیره په دغه اوسنی مقطع د زمان کښی ، چه پاکستان نه د ننه او نه هم د باندی دوست لری . ددی نه علاوه پاکستان باید افغانستان ته د خپل ۵۰ کلنی جګړیزی لوبی ټول جانی او مالی خسارت ورکړی ، دا په پاکستان پوری اړه لری چه په خپله یوازی دغه پور ادا کوی او که په دغه جګړه کښی د خپلو حامی دولتونو نه. پاتی شوه هغه جنګی جنایات چه پاکستانی نظامیانو او چارواکو په افغانستان کښی کړی ، هغه به د افغانستان د ملت او دولت په غوښتنه ، د جنګی جنایاتو د بین المللی محکمی د طرفه تر څیړنی لادنی نیول کیژی . لنډه دا چه پاکستان په افغانستان کښی د یوه لوی او درانه جرم او خسارت سبب ګرزیدلی ، چه مجبور دی دغه پور په یوه درانه قیمت ادا کړی.

LEAVE A REPLY

Please enter your comment!
Please enter your name here

- Advertisment -

ادب