دوشنبه, نوومبر 29, 2021
Homeخبرونهاقتصادي خبرونهسویډن او پاکستان وايي، د افغانستان اقتصاد د سقوط کېدو په درشل...

سویډن او پاکستان وايي، د افغانستان اقتصاد د سقوط کېدو په درشل کې دی

تاند (یکشنبه، د عفرب ۲مه) د سویډن او پاکستان وزیرانو پرون وویل، که نړیواله ټولنه ژر اقدام ونه کړي، د افغانستان اقتصاد به ژر وپاشل شي.

د سوېډن د نړیوالې همکارۍ د پراختیا وزیر پیر اولسن فریت په دوبۍ کې له رویټرز خبري اژانس سره په مرکه کې پرون وویل، افغانستان ترهغه څه چې اټکل کېده د سقوط لور ته چټک درومي.

ده ټینګار کړی چې افغانستان د اقتصادي سقوط په نتیجه کې د سیاسي پاشلتیا لور ته هم روان دی.

د طالبانو لاسته د افغانستان له لوېدو وروسته لوېدیځ او په مجموع کې نړیوالې ټولنې له دې هېواد سره د میلیاردونو ډالرو مرستې ودرولې.

د سویډن د نړیوالې همکارۍ د پراختیا وزیر ویلي، د ده اندېښنه دا ده چې افغانستان د سقوط په درشل کې دی او دا سقوط تر هغه څه چې دوی مخکې فکر کاوه، چټک را روان دی.

فریت خبرداری ورکوي چې د افغانستان اقتصادي پاشلتیا به تروریستي ډلو ته لار هواره کړي.

دې ته ورته اندېښنې ځینو نورو لوېدیځو چارواکو هم څرګندې کړي دي.

د پاکستان د اطلاعاتو وزیر فواد چودري هم په دوبۍ کې رویټرز خبري اژانس ته ویلي چې په افغانستان کې د بشري ناورین د مخنیوي یوازینۍ لار دا ده چې له طالبانو سره مخامخ خبرې وشي او د افغانستان ملیاردونه ډالره کنګل شوې پیسې ازادې شي.

پاکستان، چې په خپله د اسعارو له زښت کموالي او د پورونو له لوی پېټي سره مخامخ دی، بیا بیا د افغانستان بانک د شاوخوا ۱۰ ملیارد ډالره کنګل شوې شتمنۍ د ازادېدو غوښتنه کوي.

سره له دې چې پر افغانستان مرستې بندې شوي او د افغانستان په بازارونو کې ډالر لږ موندل کېږي، د افغان صرافانو په وینا اوس هم له افغانستانه پاکستان ته ډالر قاچاق کېږي.

چودري وویل «ایا موږ غواړو چې افغانستان د ګډوډۍ لور ته سم کړو او که غواړو چې ثبات پکې راولو.»

چودري په کابل کې د اروپايي هیوادونو د سفارتونو د پرانیستلو لپاره شرطونه هم ناسم بلل.

د اروپايي اتحادیې ۲۷ غړیو هېوادونو چې سویډن هم په کې شامل دی، د طالبانو له واک ته رسېدو وروسته له افغانستان سره بشري مرستې ډېرې کړي، خو له دې هېواد سره یې د پرمختیايي چارو لپاره مرستې درولي دي. دې ته ورته اقدام ګڼو نورو هېوادونو او نړیوال بانک هم کړی دی.

سویډن او نور هېوادونه وايي چې افغانانو ته مرستې د طالبانو په لاس نه رسوي بلکې په مستقیم ډول یا د مرستندویو موسسو له لارې اړو افغانانو ته مرستې ورکوي.

د سویډن د نړیوالې همکارۍ د پراختیا وزیر په وروستیو څو ورځو کې په دوحه کې د قطر له چارواکو سره ولیدل. باور کېږي چې قطر پر طالبانو اغېز لري.

د پاکستان د اطلاعاتو وزیر چودري د امریکا، چین او نورو لویو قدرتونو لپاره لازمه ده چې د افغانستان د نوي حکومت د رسمیت پېژندلو لپاره یو کاري چوکاټ جوړ او د طالبانو د نوي حکومت مشران د ملګروملتو د بندیزونو له لیسته وباسي.

LEAVE A REPLY

Please enter your comment!
Please enter your name here

- Advertisment -

ادب