پنجشنبه, جنوري 27, 2022
Homeخبرونهد ط ویاند له امریکا او نورو وغوښتل چې د دوی حکومت...

د ط ویاند له امریکا او نورو وغوښتل چې د دوی حکومت په رسمیت وپېژني

تاند(شنبه، د عقرب ۸مه) طالبانو د امریکا له متحدو ایالتونو او نورو هیوادونو وغوښتل چې د دوی حکومت په رسمیت وپېژني او که یې ونه پېژني د دې او د افغانستان د شتمنیو د کنګل کېدو منفي ستونزې به نه یوازې افغانستان بلکې نړۍ وویني.

د رویټرز خبري اژانس د راپور له مخې،  د طالبانو د حکومت ویندی ذبیح الله مجاهد نن / شنبې په یوه خبري غونډه کې وویل «امریکا ته زموږ پیغام دا دی، که زموږ نه رسمیت پېژندنه دوام وکړي، د افغانستان ستونزه دوام کوي، دا د سیمې ستونره ده او کېدای شي د نړۍ پر ستونزې بدله شي.»

تراوسه پورې د نړۍ هیڅ هیواد د طالبانو حکومت په رسمیت نه دی پېژندلی او د افغانستان شاوخوا ۱۰ ملیارد ډالره اسعاري زېرمه په امریکا او نورو هیوادونو کې کنګل شوې ده.

پرون د روسیې د بهرنیو چارو وزیر هم وویل چې د طالبانو حکومت به په رسمیت ونه پېژني. دا په داسې حال کې ده چې روسیه د اشرف غني د حکومت پر پرزېدو او د امریکايي پوځیانو پر وتلو خوشاله ده.

ذبیح الله مجاهد وویل، تېر ځل هم د امریکا او طالبانو ترمنځ د جګړې دلیل دا و چې د دواړو خواوو ترمنځ دیپلوماتیکې اړیکې نه وې.

امریکا د ۲۰۰۱ م کال د سپټمبر په یوولسمه نېټه په امریکا کې له تروریستي بریدونو او د اسامه بن لادن له نه سپارلو وروسته په افغانستان کې پر طالبانو بریدونه وکړل چې په نتیجه کې یې د هغوی رژیم یې وپرزېده.

خو ذبیح الله مجاهد وايي «دا ډول مسلې چې د جګړې سبب شوې، د خبرواترو له لارې حل کېدای شوای، دا د سیاسي جوړجاړي له لارې هوارېدلی شوای.»

مجاهد ټینګار وکړ چې د طالبانو د حکومت په رسمیت پېژندا د افغانانو حق دی.

سره له دې چې هیڅ دولت د طالبانو حکومت په رسمیت نه پېژني، د بېلابېلو هیوادونو چارواکي له طالبانو سره تماس نیسي ځکه چې ټول بېره لري چې د افغانستان انزوا به ترهګرو ډلو ته فرصت برابر کړي چې یو وار بیا په دغه هیواد کې ځالې جوړې کړي.

1 COMMENT

  1. تالبان دې لږ ځانونه سړي کړي. د بندو دروازو سیاست د هېڅ عاقل او هوښیار حکومت تګلاره باید نه وي.

    د ښځو زده کړه د ښځو اسلامي حق دی. طالبان کلیوالي دود د اسلام په نامه په ښځو کړی.

LEAVE A REPLY

Please enter your comment!
Please enter your name here

- Advertisment -

ادب