پنجشنبه, جنوري 27, 2022
Homeخبرونهد افغانستان په اړه غونډه؛ هند کومه اجنډا تعقیبوي؟

د افغانستان په اړه غونډه؛ هند کومه اجنډا تعقیبوي؟

تاند:( چار شنبه، د عقرب نولسمه) د هندوستان پلازمېنه نوې ډیلي نن د افغانستان په اړه له پاکستان او چین پرته د سیمې د هېوادونو د ملي امنیت سلاکارانو د حضوري غونډې کوربه توب کوي.

په دې غونډه کې پاکستان او چین له ګډون څخه ډډه کړې ده. پاکستاني چارواکو ویلي، چې هندوستان د افغانستان د ثبات خنډ و، ځکه خو یې د سولې او ثبات په اړه غونډې ته نه ورځي.

چینایي چارواکو بیا په غونډه کې د نه ګډون دلیل تخنیکي او نورې ستونزې ښودلي دي.

هندي رسنیو ویلي، چې په افغانستان کې د ترهګریزو ګواښونو زیاتیدل، له افغانستان سره د بشري مرستو همغږي کول او د افغانستان اوسني حکومت سره د سیمه ییزو هېوادونو د اندیښنو او غوښتنو توحیدول او شریکول د نننۍ غونډې عمده موخې دي.

ایران، قزاقستان، قرغیزستان، روسیه، تاجیکستان، ترکمنستان او ازبکستان د دې غونډې مېلمانه دي او د ملي امنیت سلاکارانو په کچه استازي یې ور لیږلي دي.

د یو شمېر دغو هېوادونو استازي پرون هندوستان ته رسیدلي او د دغه هېواد د ملي امنیت سلاکار آجیب دوال سره یې لیدنې کتنې لرلي دي.

افغان شنونکی احمد سعیدي وړاندوینه کوي، چې که پاکستان له نورو سیمه ییزو هېوادونو سره د افغان طالبانو د مثبت تعامل خنډ شي او افغانستان د خپلو ګټو لپاره وکاروي، په سیمه کې ورسره مخالف هېوادونه به د هندوستان په محوریت طالب ضده جبهه پرانیزي.

د سعیدي په باور، امریکا متحده ایالات هم په وروستیو کې هندوستان سره ډېر نیږدې شوي او که د طالبانو او نړیوالې ټولنې ترمنځ اړیکې ونه رغیږي، ډېر امکان یې شته چې متحده ایالات د هند په محوریت تاجیکستان، ایران او د سیمې یو شمېر نور هېوادونه د طالب ضد بلاک د غړو په توګه د پردې شاته حمایه او د پاکستان او طالبانو خلاف اقدامات همغږي کړي.

د طالبانو ویاند ذبیح الله مجاهد په هندوستان کې د دې غونډې ترسره کیدل د ښه نیت له کبله ګڼلي او ویلي، چې دوی په دې غونډه کې د نه بللو باوجود هیله لري چې دغه غونډه به د افغانستان لپاره ښې پایلې ولري.

1 COMMENT

  1. دا د پاکستان منافقت او شیطانت دی، چې دغې غونډه کې برخه نه اخلي، او هر افغان په دې حقیقت خبر دی، چې د افغانستان اوسنی دښمن پاکستان دی، او تل یې د افغانانو سوله، یووالی او پرمختګ د خنډ سر مخ کړي، او تل یې د افغانانو کور ته اور راوړی دی.
    په داسې یو حساسه شیبه کې پاکستان طالبانو ته بلنه ورکوي، او هلته به داسې څه کوي چې د افغانستان په ګټه به نه وي. پکار وه چې طالبانو د دې غوندې تر پایه د زغم څخه کاراخیستی وی، بیا په عین وخت کې پاکستان ورپسې ورځ د یوې بلې غونډې د کوربتوب اعلان کوي، یقینا چې پاکستان طالبان د خپل د لاس آلو په شان کاروي، او د خپلې بهرنۍ پالیسۍ په توګه ترې نه کار اخلي، تر څو افغانستان ښه وشرموي، او کریډیت دوی واخلي او شومو موخو ته ځان ورسوي.

LEAVE A REPLY

Please enter your comment!
Please enter your name here

- Advertisment -

ادب